Пивара Скопје и Ракометната федерација на Македонија официјално го потпишаа договорот за спонзорство со што се одбележуваат 45 години континуирано партнерство и поддршка на македонскиот ракомет.  Договорот го потпишаа генералниот директор на Пивара Скопје, Огњен Лазиќ и претседателот на РФМ Александар Стефанов, а на настанот присуствуваа и голем дел од репрезентативците.

Пивара Скопје, како една од најстарите и реномирани компании во земјава, преку ова партнерство уште еднаш ја потврдува својата долгорочна посветеност кон спортот, заедницата и вредностите кои ги обединуваат македонските граѓани. Соработката се темели на заеднички вредности кои ги делиме, како тимска работа, истрајност, фер – плеј и континуирана поддршка на спортскиот развој, изјави Огњен Лазиќ, генералниот директор на Пивара Скопје.

„45 години партнерство со РФМ се доказ дека кога веруваш во спортот и луѓето резултатите се неизбежни. За нас, ова не е само спонзорство, туку долгорочна посветеност кон македонскиот ракомет, неговиот развој и иднина. Горди сме што продолжуваме да стоиме зад спорт кој обединува генерации и носи радост на целата македонска нација. Благодарност на РФМ, селекторот, капитенот и целата екипа: вие го носите дресот, а ние ја носиме одговорноста да сме со вас на секој меч, во секоја сезона. 45 години заедништво нè обврзуваат, а следните 45 нè инспирираат. Нашата заедничка приказна, Пивара Скопје и РФМ, продолжува,“ рече Лазиќ.

Претседателот на РФМ нагласи дека поддршката од долгорочните партнери е клучна.

„Четириесет и пет години континуирана поддршка од Пивара Скопје е вистински пример како треба да се однесува една општествено одговорна компанија. Вашето партнерство со РФМ остави силен белег врз македонскиот ракомет и врз спортот во целина. Убедени сме дека оваа соработка ќе продолжи и во иднина и ќе биде поттик за нови успешни спортски приказни. Нашата амбиција е јасна, ракометот да биде број еден спорт во земјава, да носиме успеси и да создаваме моменти на радост за сите во Македонија. Ви благодариме за довербата и за континуираната поддршка. Заедно ќе се радуваме на нови успеси и победи, “ изјави Александар Стефанов, претседател на РФМ.

45 години партнерство меѓу Пивара Скопје и РФМ претставува силен пример за долгорочна соработка заснован на доверба и заедничка визија. Низ годините ова партнерство придонесува за поддршка на македонскиот ракомет како еден од најпрепознатливите македонски спортови кој носи бројни меѓународни успеси.

Со потпишување на овој договор, Пивара Скопје и РФМ ја продолжуваат заедничката мисија за развој и унапредување на македонскиот ракомет и промоција на спортските вредности меѓу младите. Ова е потврда дека успешните приказни во спортот се градат со посветеност и континуитет.